Ginkalipay sang pila ka mga operators kag drivers ang pagdismiss sang kaso nga 38 counts of carnapping nga ginpasaka batok sa ila sang Choret Corporation.
Madumduman nga sang Disyembre sang tinalikdan nga tuig nagpangayo sang bulig si Philip Burata nga isa ka consolidated franchise operator sang Choret Corporation, matapos nga ginpasakaan sila sang kaso nga 38 counts of carnapping sang korporasyon.
Sa interview sang Bombo Radyo kay Burata, nakig-angot ini sa Choret Corp sa pagpaconsolidate sang ila nga franchise bilang pagsunod sa modernization program.
74 ka mga units ang gin-award sang Land Transportation Franchising and Regulatory Board through notice of selection apang una nga 44 pa lang ang units nga nag-abot.
Sila man ang nagabayad sa Choret Corp sang tag P1,000 sa kada units kada bulan para sa mga dokyumento sang ila modernization vehicle.
Ila man nakita ang certified copy sang Securities and Exchange Commission kag didto na nila nahibaluan nga lima lamang ka miyembro nila ang nakalista sa korporasyon imbes nga 22.
Suno kay Burata, luyag sini nga mangayo sang written agreement sa Choret Corp, agud nga mas klaro ang plastaranay.
Dugang pa sini, manami ang programa sang gobyerno apang wala ini naplastar sang insakto amo nga madamo sang nabiktima sang programa.
