Ginkompirmar sang City Health Office (CHO) nga papaulion na subong nga adlaw ang 38 ka mga Bacolodnons sa 115 ka mga persons under monitoring (PUM) nga naka-quarantine sa Mambukal Resort matapos magnegatibo sa coronavirus disease 2019 (COVID-19).
Suno kay CHO head Dr. Ma. Carmela Gensoli, 38 ka mga pasyente, nga nakatapos na sang ila mandatory 14-day quarantine kaupod ang iban pa nga manug-abot nga mga PUMs, ang sugaton sang city bus subong nga aga kag idul-ong sang ila tagsa-tagsa nga mga puluy-an.
May gindesignar si Gensoli nga nurse nagikan sa CHO agud i-assist ang mga pasyente kag idul-ong ang mga ini “door to door”.
Samtang nakaquarantine ang mga Bacolodnons sa Mambukal Resort bilang kabahin sang 115 ka mga PUMs, nagabulig ang Bacolod City government paagi sa pagpadala sang 10 ka sako sang bugas, pila ka mga karton sang canned goods kag toiletries sa provincial capitol bangud ang provincial government ang nagamanage kag nagamonitor sang grupo.
Ang 38 ka mga PUMs ang kabahin sang una nga batch sang 89 ka mga Negrense nga nag-abot sa Bacolod-Silay Airport nagikan sa Clark International Airport sang Marso 19.
Matapos ang duha ka adlaw, nag-abot ang ikaduha nga grupo sang 26 ka mga Negrenses kun sa diin duha sa mga ini ang nagikan sa Bacolod kag nag-abot sa BREDCO port paagi sa RORO vessel nagikan sa Batangas.
Ang nasambit nga mga Negrense ang nastranded sa Luzon matapos ginpaidalum ang rehiyon sa Enhanced Community Quarantine.
Gin-assist sila sang provincial government agud makaboard sa isa ka special Cebu Pacific flight kag RORO vessel pabalik sa Negros Occidental.
Pag-abot sang mga ini sa probinsya, gilayon sila nga gindala sa Mambukal Resort para sa mandatory 14-day quarantine.
