Kapin 380 mil pesos ang balor sang napatay nga mga sapat sa probinsya sang Negros Occidental matapos malumos sa tubig-baha bangud sa pagwaswas sang Bagyo Quinta.
Sa interview sang Bombo Radyo Bacolod kay Provincial Veterinarian Dr. Renante Decena, ginpahayag sini nga nagdangat sa P376,841 ang mga sapat nga napatay sa lima ka mga local government units sa probinsya.
Santo sa data nga nalikom ni Decena, isa ka karbaw, apat ka baka kag 46 ka mga pato ang nagkalamatay sa banwa sang Hinobaan; tag-isa ka karbaw, mga free range chicken kag mga pato naman ang nagkalamatay sa banwa sang San Enrique kag Valladolid; sa ciudad sang Bago, nagkalalumos naman sa tubig-baha ang mga free range chicken kag mga baboy kag may yara naman sang mga game fowl chicken nga nagkalamatay sa ciudad sang La Carlota.
Suno kay Decena, nagpadala na ang Provincial Veterinary Office sang team agud nga mabuligan ang mga apektado nga mga sapat.
Suno sa provincial veterinarian, magahatag ang PVO sang mga bulong kag immunization sa mga sapat nga naapektuhan sang pagbaha.
Ginalantaw naman sini nga ang mga local provincial veterinary office nalang ang mahatag sang bulig pinansyal sa mga apektado.
