Pila ka grupo ang nagtipon kaina sang kaagahon agud dumdumon ang 39th EDSA People Power revolution.
Madumduman nga gindeklarar nga special working day ang Pebrero 25 gani alas-5:30 pa lamang sang kaagahon, naghugpong na ang mga ini bangod ang iban ang may trabaho pa.
Sa interview sang Bombo Radyo Bacolod kay Ma. Joy Jarabelo, provincial coordinator sang Federation of Urban Poor – Negros (FedUP-Negros) sila ang naghalad sang bulak kag nagbutang sang yellow ribbon sa monumento ni late Senator Benigno Simeon “Ninoy” Aquino Jr. sa dalan Araneta, Bacolod City.
Gikan sa lainlain nga asosasyon, sila ang nagsuksok man sang nanarisari nga kolor sang panapton.
Matapos ang flower offering kag pagbutang sang yellow ribbons, sila ang nagpatigayon naman sang caravan padulong sa Our Lady of Lords Parish sa Barangay Bata para sa special mass.
Ang misa ang gin-officiate ni Fr. Anecito Buenafe.
Ginbalikan man diri ang natabo sadto kun sa diin napatigayon ang madinalag-on nga non-violent people power revolution paagi sa paghugpong sang minilyon nga mga Pilipino.
Ini agud ma-untat ang pagpamigos sa ginakabig nila nga pinakamadulom nga sitwasyon sa maragtas sang pungsod.
Suno kay Jarabelo, kun wala nanindugan ang minilyon, wala sang demokrasya nga gina-enjoy sa karun.
Ginbalikan man sa misa ang paghalad sang kabuhi ni Ninoy kun sa diin sa eroplano pa lamang ginklaro na sini nga siya ang wala sang plano nga magpapili sa pagbalik sa Pilipinas.
Ang purpose lamang sini amo ang hingyuon si anay Presidente Marcos nga tadlungon ang pagpamalakad sa gobyerno kag untaton na ang diktatorya.
Aminado man ini nga siya ang nahadlok nga mapatay, apang siya ang nanindugan para sa mga Pilipino, bangod para sa anay Senador ang mga Pilipino ang “worth dying for.”
Ginpaanggid ni Fr. Buenafe si Ninoy kay Ginoong Hesu Kristo, nga napatay para sa tawo kag nabanhaw makaligad sang tatlo ka adlaw, sa baylo si Ninoy ang napatay para sa tawo kag makaligad sang tatlo ka tuig, natabo ang EDSA People Power revolution.
Dugang pa ni Jarabelo nga si Ninoy ang nakadupa kag kaangay nga nagakulo ang isa ka tuhod sang mapatay, nga kaangay nga nagapakita sang paghalad sini sang kabuhi para sa pungsod, kaanggid sa pagdupahon ni Hesus sa krus para sa tawo.
