Ginasuportahan sang Philippine Army nga mangin kabahin sila sang Task Force Kontra Bigay sang Commission on Elections (COMELEC) agud nga matutukan ang vote buying samtang nagahilapit ang May 9, 2022 elections.
Sa interview sang Bombo Radyo Bacolod kay Army Captain Kim Apitong, tagpamaba sang 3rd Infantry Division sang Philippine Army, wala pa sila nabaton nga guidelines sa paglakip sa ila sang COMELEC agud nga mangin kabahin sang nasambit nga Task Force.
Suno kay Apitong suportado sang Philippine Army ang nasambit nga tikang bangud maayo ini para sa electoral.
Ginpahayag man sini nga madamo man sang mga units ang Philippine Army sa Western Visayas nga mahimo mangin kabahin sang Task Force.
Nagpanawagan man ang tagpamaba sang 3rd ID sa mga kandidato nga indi maghatag sang bisan ano sa mga katapo sang New People’s Army (NPA) bangud ini ang nagapakita sang pagsuporta sa mga rebelde.
Suno kay Apitong, sin-o man nga mapamatud-an nga nagahimo sini ang magapangatubang sang kaso nga paglapas sang Anti-Terrorism Act of 2020 ukon penalidad nga reclusion perpetua kag pagbayad sang P10 million nga multa.
Samtang, aminado man si Apitong nga pagpanghangkat para sa mga otoridad ang pagdakop sa mga nagapamakal sang boto bangud wala man sang nagapanugid kag nagaako nga nagbaligya ukon nagpabakal man sang ila nga boto.
Apang positibo naman ini nga mahimo man nga mapadasig ang pagtipon sang impormasyon may kaangtanan sa vote buying activities bangud mahimo na ini makita sa social media.
Nagpasalig man ang tagpamaba nga apisar mangin masako sila sa election related operations indi man sang Philippine Army paghalugan ang ila nga gwardiya kag pagpatigayon sang mga operasyon batok sa rebeldeng NPA.
