Nagalaom ang 3rd Infantry Division nga mas magadamo pa ang miyembro sang New People’s Army nga magabalik sa sabak sang gobyerno kaangay sang nauna nga mga rebel returnees.
Sa interview sang Bombo Radyo kay 3rd ID spokesperson Capt. Kim Apitong, apat ang kabug-usan nga nagsungka sa Panay kag Negros halin sa ulihi nga semana sang Mayo tubtub subong nga bulan.
Sa Panay, nagsungka ang 21 anyos nga si Alyas Andrew kag 33 anyos nga si Alyas Samson.
Sila ang miyembro sang Squad II Baloy Platoon Central Front sang Komiteng Rehiyong Negros kag nagsungka sa 82nd Infantry Battalion sang Mayo 23.
Bitbit sang mga ini ang isa ka caliber .38 revolver kag isa ka granada.
Ginsundan ini sang mag-asawa nga Alyas Yago kag Alyas Yasi nga nagsungka diri sa Negros.
Si Yago ang nagaedad sang 36 anyos kag 17 na ka tuig nga yara sa hublag, samtang ang iya misis nga nagaedad sang 23 anyos kag lima na ka tuig sa hublag.
Suno kay Apitong, una nagsulod sa NPA ang mister kag nagsunod si Yasi.
Sila ang miyembro sang Southeast Front sang Komiteng Rehiyong Negros-Cebu-Bohol-Siquijor nga dismantled na sa karon.
Ang dismantling suno kay Apitong ang ginalantaw nga rason sang amat-amat nga pagbalik sang mga rebelde sa sabak sang gobyerno.
Nagalaom naman ang 3rd Infantry Division nga magasunod man ang iban nga miyembro sang NPA kag magasungka naman.
Suno kay Apitong, masami nagapamati sa radyo ang mga utod sang mag-asawa nga amo naman ang nag-relay sa ila sang impormasyon angot sa mga programa sang gobyerno para sa rebel returnees gani naengganyo nga magsungka.
Ang pagsungka nanday Yago kag Yasi ang gin-facilitate sang 11th Infantry Batallion kag 507th Mobile Company sang Regional Mobile Force Batallion sang Philippine National Police.
