Wala pa nakabalik ang imbestigador sang 3rd Infantry Division nga nagimbestigar sa ginpalab-ot sa ila nga impormasyon nga may yara sang nagpakilala nga katapo sang 3rd ID nga nagakuha sang personal nga impormasyon sang mga katapo sang media sa probinsya sang Negros Occidental.
Sa interview sang Bombo Radyo Bacolod kay Army Major Cenon Pancito III, spokesperson sang 3rd ID, ginpahayag sini nga wala sila sang mando nga pagakuhaan sang personal nga impormasyon ang ila nga media partners.
Suno kay Pancito, ila pa sa karun nga ginapadalman ang imbestigasyon angot sa impormasyon nga ila nakuha.
Madumduman nga sang tinalikdan nga adlaw, ang nagpakilala nga si Staff Sgt. Ryan Buenavista ang nagpafill-up sa pila ka radio kag print reporters sa Bacolod kun sa diin nalakip sa mga impormasyon sa form ang tuhoy sa educational background, specific address kag miyembro sang pamilya.
Suno kay Buenavista, requirement ini sang 3rd ID sa mga media partners.
Gin-athag man ni Pancito nga kun nagpakuha man sila sang personal nga impormasyon sa mga media partners maga-agi ini sa opisina sang Division Public Affairs Office (DPAO) bangud ini ang opisyal nga media relations office sang 3rd ID.
Ginpahayag man sini nga wala man sang may nabaton nga pamahog ang ila hanay nagikan sa media.
Padayon pa sa karun ang ila nga imbestigasyon angot sa impormasyon nga ginpalab-ot sa ila.
Ginpahayag man ni Pancito nga masami man nga bukas ang ila linya sa tion nga kinahanglan ang impormasyon nagikan sa ila.
