Nagapati ang tagpamaba sa 3rd Infantry Division sang Philippine Army nga natun-an sang maayo sang pamunuan sa Armed Forces of the Philippines ang pagpatukod sang pasilidad sang DITO Telecommunication sa mga kampo sang militar antes paman ini ginrekomendar sa Department of National Defense
Nahibaluan nga napirmahan na ni National Defense Secretary Delfin Lorenzana ang pagpahanugot sa mga kampo sang militar nga matukuran sang pasilidad sang DITO Telecom, para sa pagpasanyog sang kumunikasyon.
Suno kay Army Major Cenon Pancito III, wala sang kaangtanan ang 3rd ID sa kun ano man ang desisyon sang AFP bangod magagikan ini sa mismo nga mga pamunuan sang organisasyon kag ginapatigayon sa headquarters ukon sa Camp General Emilio Aguinaldo.
Pasalig naman ni Pancito nga kun ano man ang makasugtan sa babaw, magasuporta naman ang mga kasuldaduhan.
Ginpakigbahin man sang tagpamaba nga madugay na nga ginkunsiderar kag gina-estoryahan sang hanay sang AFP ang amo nga proyekto.
Nagapati naman si Pancito nga maid-id nga natun-an ang proyekto antes paman ini ginrekomendar sa Department of National Defense.
Aminado naman ini nga may risgo ang programa, apang mas nagapati ang mga ini nga makabulig ini sa pungsod kag mga pumuluyo kun mapasanyog ang kumunikasyon sang militar.
Pasalig naman ni Pancito sa mga pumuluyo nga wala ang mga ini sang dapat nga ikabalaka bangod may nakadedikar man nga opisina sa kampo sang militar kun sa diin mahamtang ang Telecom services.
Dugang pa sini nga may Cyber Analyst, Information System Analyst kag Cyber Lawyers man ang mga ini nga magatutok sa operasyon.
Suno kay Pancito, indi lang DITO Telecom ang nagaisahanun nga Telecom Company nga mapatukod sa mga kampo sang militar, bangod nauna na nga may pasilidad sa mga kampo ang Smart kag Globe Telecommunications.
