Masobra sa P4.2 million nga balor sang illegal nga druga ang nakumpiskar sang Bacolod City Police Office- City Drug Enforcement (BCPO-CDEU) halin kagab-i tubtob kaina sang kaagahon.
Kagab-i arestado ang duha ka mga lalaki nga nakuhaan sang masobra P3.5 million nga balor sang suspected shabu sa drug buybust operation sa Zone 5, Barangay Handumanan, Bacolod City.
Ginkilala ang mga nadakpan nga sanday, Levi June Tapang, alyas Jerome, 29 anyos, residente sang Lucky Homes sang nasambit nga Barangay, Raegil Alarcon, 30 anyos, residente sang Fortune Town, Barangay Estefania, syudad sang Bacolod.
Si Tapang ang ginakabig nga High Value Individual samtang si Alarcon ang Street Level Individual kag nakaagi na preso bangud man sa iligal nga droga.
Ang illegal nga druga nga nakuha sa duha ang ginabanta nagabug-at sang 520 grams kag may kabug-usan nga balor sang P3,536,000.
Samtang, kaina naman sang kaagahon, P680,000 nga balor sang suspected shabu ang narecover gikan sa jeepney driver kag fish vendor sa drug buybust operation nga ginpatigayon sa Bangga Vista Alegre, Barangay Mansilingan.
Ang mga naaresto amo sanday Reagan Perez, 38 anyos, single, jeepney driver kag residente sa Zone 9, Brgy.Handumanan, Bacolod City, ginakonsiderar High Value Individual (HVI) kag yara man sa listahan sang Barangay Anti-Drug Abuse Council (BADAC); kag si Rolando Padilla, 40 anyos, kasado, fish vendor kag residente sang 81 Galo-Ramos Streets, Brgy. 22, Bacolod City, nga ginakonsiderar Street Level Individual (SLI).
Sa interview sang Bombo Radyo Bacolod kay CDEU Head Police Lt Col Antonio Benitez, suno sa mga suspetsado ang mga items nila naghalin pa sa Luzon.
Suno diri, ang mga suspect sa Brgy Handumanan amo ang nagbulos sa mga suspek nga nadakpan sadto sa Brgy Mansilingan nga naga-operate sa Brgy.Handumanan.
Samtang sa Brgy Vista Alegre naman, ginamonitor sadto ang mga suspek kasunod sa complaint sang mga pumuluyo nga nakulbaan sila para sa ila safety.
