Gindeklarar sang apat ka mga farmer’s associations sa banwa sang Hinigaran ang Communist Party of the Philippines-New People’s Army (CPP-NPA) bilang persona non grata kag ginkondenar ang ila nga mga indi husto nga kahimuan.
Sa interview sang Bombo Radyo Bacolod kay 303rd Infantry Brigade commander Col. Inocencio Pasaporte, ginpahayag sini nga masobra 200 ka mga mangunguma ang nagtipon kag nag-denounce sa CPP-NPA.
Suno kay Pasaporte, ang ini nga mga mangunguma ang gintuyo nga i-organisa sang Paghidaet Development Group (PDG) nga front group sang CPP-NPA.
Dugang pa sini nga nalipay gid siya bangud amat-amat nga nagakakita sang mga pumuluyo ang indi husto nga buluhaton sang maka-wala nga grupo.
Paathag ni Pasaporte, nareyalisar sang mga mangunguma nga daw kaangay lang nga ginatunto, ginagamit kag ginapang-kwartahan lang sila sang rebelde nga grupo.
Liwat naman nga nagapanawagan ang 303rd IB commander sa iban pa nga mga miyembro sang CPP-NPA nga magbalik na sa sabak sang gobyerno.
Samtang, ginpasalig man sini nga magapadayon ang operasyon sang tropa sang militar sa mga rebelde kag indi nila pag-untatan ang paglagas sa mga ini.
