Patay ang 4 ka mga kapulisan matapos gin-ambush sa banwa sang Ayungon probinsya sang Negros Oriental kaina sang hapon.
Sa impormasyon nga nakuha sang Bombo Radyo Bacolod, alas-2:30 kaina sang hapon sang natabo ang pagpang-ambush sa Sitio Ilaya-Yamot, Barangay Mabato, Ayungon.
Dead-on-the spot sanday Police Corporal Relebert Beronio, Patrolman Raffy Callo, Patrolman Roel Cabellon, kag Patrolman Marquino de Leon.
Sa exclusive interview sang Bombo Radyo kay Ayungon Mayor Erwin Agustin, iya gin-kumpirmar nga isa ka ambush ang natabo sa ila lugar.
Sa nakuha nga impormasyon ni Agustin sa Ayungon Police Station, nag-patigayon sang surveillance ang 4 ka mga pulis nga lunsay intelligence sang 704 Mobile Force Company sang Regional Mobile Force Batallion- Region 7 sa lugar sa diin sakay ang mga ini sa 2 ka motorsiklo sang sila ang gin-banggaan sang indi pa nahibaluan nga numero kag wala pa nakilal-an nga mga personalidad nga gina-patihan mga miyembro sang New People’s Army (NPA).
Wala naman nakabalos lupok ang mga kapulisan bangud gilayon sila ginpaarakan-luthang sang mga rebelde kabangdanan sang ila gilayon nga kamatayon kag madasig naman nga nakapalagyo ang makawala nga grupo sa indi pa matumod nga direksyon sang lugar.
Nahibaluan man nga naka-sibilyan ang mga biktima samtang nag-patigayon sang surveillance sa lugar rason nga gina-kwestiyon sa karun sang mga otoridad kun paano na mutikan sang mga rebelde nga sila ang isa ka pulis.
Gin-kumpirmar man sang alkalde nga wala sang may gin-utdan nga ulo sa mga biktima nga yara naman sa karun sa isa ka balay-bululngan ang 4 ka bangkay agud ipa-idalum sa autopsy.
