Nagpanawagan ang apat ka mga security guard sang isa ka security agency matapos nga sila ang nadulaan sang trabaho apang wala pa ginhatag ang sweldo.
Sa ‘Ipa Bombo Ta!’ segment, basa kag nagatulo ang apat ka mga security guard sang magpadulong sa estasyon sang Bombo Radyo Bacolod kahapon agud magpanawagan sa Stelsen Security Agency.
Ang mga nagreklamo ang ginalakipan nanday Angelo Ambagan, 31 anyos, kasado, residente sang Bacolod City; Jason Chris Valerio, 27 anyos, single, sang Barangay Atipuluan, Bago City; Crescencio Corsiga III, 39 anyos, kasado, sang Bacolod City; kag Emil Cajeras, 38 anyos, kasado, residente sang Talisay City.
Sa interview sang Bombo Radyo Bacolod kay Angelo, sila ang ginmeeting sang security agency sang Mayo 27 agud pahibaluon nga nagdesisyon ang Negros Electric and Power Corporation (NEPC) kun sa diin sila nakadeploy, nga magbuhin sang tawo.
Sa ihibalo sini may 182 ka security personnel nga nakadeploy sa Negros Power kag 39 diri ang ginpahalin kalakip na sila nga apat.
Epektibo nga napahalin sila sa trabaho Hunyo 1, apang ang natrabaho nila nga Mayo 16 tubtob 31 ang wala pa maswelduhan.
Ginakwestyon man ni Angelo bangod sa inisyal nga last in-first out ang mangin basihan ukon may notice to explain (NTC) dapat ang mapahalin kun performance ang basihan, apang natingala ini nga siya ang nalakip nga wala man sang NTC kag isa ka tuig kag tatlo ka bulan na sa serbisyo.
Siya ang anay na-assign sa Boracay, apang kadungan sa pagsugod sang Negros Power sang Agosto 2024, siya ang kaupod sa ginsaylo.
Aminado ini nga may ginpabasa sa ila kag ginpirmahan apang wala man naka-indicate sa papel ang basihan sa pagpahalin sa trabaho.
Dugang pa sini nga humalin sang magsugod sa trabaho, may ginabuhin na nga P75 sa ila nga sweldo nga wala nila mahibaluan kun sa diin nagakadto bangod wala man sila ginahatagan sang payslip.
Suno diri, kuntani ginhatagan lamang sang tion nga makapreparar kun sin-o ang pahalinon kag indi nga gulpyada.
Pahayag ni Angelo nga siya ang may nagadede pa nga bata, kag sa karun ini ang naubusan na sang gatas, apang wala sang ibakal bangod sila ang wala ginhatagan sang sweldo.
Wala man sila derekta nga napalos sa ahensya, sa baylo, floating lamang ang status kag ginhatagan man sang offer nga ideploy sa Panay inkaso may magbukas nga pwesto.
Apang sa ginhimo sa ila, wala na ang mga ini plano nga magbalik sa ahensya, kag gusto na lamang mahatagan sang sweldo kag kun ano pa nga benepisyo nga nagakadapat nila nga mabatun.
Samtang handa man sila nga magfile sang reklamo, depende sa mangin dalagan sang sitwasyon.
Sa pihak nga bahin, ginpadulungan sang Bombo News Team ang Stelsen Security Agency para sa ila paathag.
Sa interview sang Bombo Radyo Bacolod kay April Britania, human resource personnel sang ahensya, maga-abot sa Bacolod City ang ila nga operations manager sa Lunes.
Paathag sini nga sila ang indi pa makapagwa sang statement bangod internal katama ang issue, kag hulaton na lamang ang operations manager.
