Apat ang patay samtang tatlo ang pilason matapos nga nakabunggo ang isa ka multi-purpose vehicle (MPV) sa cement mixer truck sa national highway nga sakop sang Barangay Batinguel, ciudad sang Dumaguete, Negros Oriental sang Sabado alas-4:30 sang kaagahon, June 22.
Sa interview sang Bombo Radyo Bacolod kay Police Lt. Col. Don Richmon Conag, officer-in-charge sang Dumaguete City Police Station, sugat-anay ang pula nga Toyota Avanza kag cement mixer truck sa kurbada nga bahin sang dalan apang ginlamon sang Avanza ang lane sang cement mixer truck.
Bangud sa impact sang pagkabunggo, wasak ang atubang nga bahin sang Avanza.
Ang mga napatay ang ginalakipan sang lalaki nga driver sang Avanza kag tatlo ka mga babayi nga pasahero, lunsay yara sa legal nga edad.
Samtang ang nasamaran ang mga nagaedad 15, 17 kag 19 anyos.
Ang Avanza ang nagikan sa Mandaluyong kag patabok sa Mindanao.
Ginalantaw sang mga kapulisan nga mahimo indi sunado sang driver ang dalan gani nagluntad ang aksidente.
May yara naman sang naistoryahan ang magtimbang nga bahin kag nakagwa na sa prisuhan ang driver sang cement mixer matapos ang reglementary period.
Suno kay Conag, ang settlement ang nakadepende na sa magtimbang nga bahin sa presensya sang ila mga abogado.
Wala na ginhingadlan ang mga imbulbado bilang pagsunod sa Data Privacy Act.
