BACOLOD CITY-Apat ang patay samtang apat man ang pilason matapos naigo sang kilat sa Hacienda Carmencita, Brgy. Don Salvador Benedicto sa banwa sang Pontevedra kahapon.
Nahibaluan nga nagapahuway sa kamalig nga nahamtang sa tunga sang talam-an ang mga biktima sang nagluntad ang pagpangilat.
Ang mga napatay ginkilala nga sanday Rubilyn Muedan, 41-anyos, Glenn Gatual, 42-anyos, Marites Garzon, 52-anyos kag Renilda Villanueva 51-anyos kag lunsay mga residente sang nasambit nga barangay.
Samtang pilason naman sanday, Lenlyn Subong, 34-anyos, Oberta Tiayo, 62-anyos, Lito Cabalida, 52-anyos kag Marites Cabalida, 40-anyos sang amo sa gihapon nga lugar.
Gilayon nga gindala sa Valladolid District Hospital ang mga biktima apang gindeklarar nga dead-on-arrival ang apat.
Sa subong, padayon naman nga ginabulong sa nasambit nga ospital ang mga pilason.
