Apat ka mga indibidwal ang gilayon nga gindala sa ospital matapos nga ma-injured sang nabunggo ang traditional jeep sa isa ka van sa Northbound Terminal sa ciudad sang Bacolod, kaina kapin alas- 10:50 sang aga.
Ang drayber sang traditional jeep ang ginkilala nga si Gary Casiple Jr, 27 anyos, kasado, kag residente sang Hda. Camantero, Brgy. Guimbala-on, Silay City.
Sa interview sang Bombo Radyo kay Rey Pagnanawon, vendor sa North Terminal, ang traditional jeep ang may ruta nga Talisay-Bacolod kag ini ang magapapanaog kun tani sang pasahero sa terminal gikan sa byahe sini sa Talisay.
Paglab-ot sa terminal, nawad-an sang preno ang jeep kag nadalasa sini ang isa ka tyangge tubtob nga nagdiretso ini bunggo sa isa ka van nga nakapark.
Suno kay Pagnanawon, nagaplastar ini sa pihak nga bahin sang van kag gingakibot sang nabunggo ang traditional jeep apang naipit naman ang tiil sang isa ka lalaki nga nagapungko malapit sa iya ginabaligyaan.
Gilayon naman nga nagresponde ang emergency response team sa area kag ginhatagan sang nagakaigo nga pagbulong si Casiple samtang gindala naman ang mga napilasan padulong sa ospital.
Ginapatihan sa karun nga nadulaan sang preno ang jeep amo nga wala ini nakontrolar kag nabunggo sa van.
