Nangin kabahin man ang OIC Assistant Superintendent sang DepEd Division of San Carlos City sa Dugong Bombo 2019 sa City Mall Mandalagan kahapon.
Sa interview sang Bombo Radyo Bacolod kay Jolito Felicano, ginpahayag sini nga anom na siya ka tuig nga nagadonar sang dugo kag nagsugod ini sang 2013.
Suno kay Felicano, nangin panata niya na ang magdonar kada tuig.
Gindugang niya man nga sugod sang nagdonate sang dugo, mas nagmag-an ang iya pamatyagan kag mas nagnami ang iya nga panglawason.
Ginpahayag man sini nga wala niya ginapanumdum kun sin-o ang makabaton sang iya nga dugo bangud suno sa iya, nagadonate siya para sa tanan.
Samtang,
Nagpreparar gid sang maayo ang isa ka blood donor para sa Dugong Bombo 2019 sa ciudad sang Bacolod.
Sa interview kay Amador Orbesta, 45 anyos kag residente sang Brgy. Sum-ag, Bacolod, ginpahayag sini nga apat na siya ka tuig nga nagadonar sang dugo sa Dugong Bombo kag suno sa iya, nagapreparar gid siya sang maayo antes magdonate.
Suno kay Orbesta, nagtulog siya sang timprano kag wala nag-inom sang alcohol sa sulod sang duha ka adlaw bag-o magdonar agud mangin successful blood donor.
Aminado siya nga sang una, wala gid siya sang interes sa nasambit nga activity apang nahibaluan niya nga sa pagdonate sang dugo, indi ka lang makabulig sa iban, makapaayo pa ini sa imo ikaayong-lawas.
Gindugang niya man nga ang pagdonar sang dugo ang makapalayo sa balatian kag makapaayo sa kondisyon sang ikaayong-lawas bangud suno sa iya, wala pa siya nakaagi masakit sugod sang nagdonar ini.
Ginpanata na sang isa lalaki ang pagdonar sang dugo kada tuig gani nag-ugyon ini sa Dugong Bombo sa City Mall Mandalagan kahapon.
Sa interview sang Bombo Radyo Bacolod kay Jury John Cantal, ginpahayag sini nga madugay niya na nga ginabantayan ang Dugong Bombo bangud luyag sini nga magbulig paagi sa pagdonar sang dugo.
Si Cantal ang 23 anyos kag isa auto mechanic kag suno sa iya, yara na sa iya nga memorandum nga magdonar kada Nobyembre.
Suno iya, ika-tatlo na ini nga tuig nga nagadonar siya sa Dugong Bombo.
Gindugang niya man nga gamay lang ang mahatag sang nagadonar sang dugo apang dako na ang balor nga mabulig sini sa mga nagakinahanglan.
Ang atun nga lawas suno kay Cantal, ang kaangay sang isa ka makina nga kun maislan sang gasolina, nagamag-an ang paggiho gani kun nagadonar sang dugo, ang kaugalingon man nga lawas ang magabenepisyo.
