Padayon nga ginadapatan sang pagbulong ang 40-anyos nga lalaki matapos ini nga ginbuno sang iya kaugalingon nga pakaisa sa Sitio Adlatawan, Barangay Buluangan, San Carlos City, Negros Occidental sang Pebrero 1, 2024.
Ginkilala ang biktima kay Ranie Ferrer samtang ginkilala naman ang suspek kay Renato Cañete, 45-anyos, mangunguma kag lunsay residente sang nasambit nga lugar.
Sa interview sang Bombo Radyo Bacolod kay Police Major Ryan Villasario, Deputy Chief of Police San Carlos City Police Station, nagpadulong sa balay ni Renato Cañete si Rannie Ferrer agud magpanukot sang utang P500.
Suno kay Villasario, nagluntad ang mainit nga argumento nga nagdangat sa komosyon kun sa diin hinali lamang nga ginbuno sang suspek ang biktima sa tiyan.
Gilayon nga gindala sa ospital ang biktima agud nga mabulong.
Nagsungka naman ang suspek sa mga kapulisan kag sa karun, ginahulat nalang ang pamilya sang biktima agud nga magpasaka sang kaso.
