Ginrekomendar sang Business Permit and Licensing Office sang Bacolod City Government sa City Legal Office nga saraduhan ang 40 ka mga commercial establishments bangod sa indi pagproseso sang business permit.
Sa interview sang Bombo Radyo Bacolod kay Bacolod City Permits and Licensing Division head Stella Rose Rayos, segi-segi ang ila nga inspection sa mga business establishments kun sa diin aminado ini nga madamo pa sang nagaproseso pa sang mga clearances nga required agud makakuha sang business permit.
Sa pihak sina ang Business Permit and Licensing Division ang nagrekomendar na sa City Legal Office sa pagpasarado sang 40 ka mga negosyo.
Ang mga ini ang ginalakipan sang mga kalan-an, ilimnan, laundry shops kag iban pa.
Paathag ni Rayos nga sa ila inspection, sila ang nagadagdag sang 1st notice sa mga wala pa sang mayor’s permit.
Kinahanglan naman nga magpadulong sa Business Permit and Licensing Office ang mga natungdan sa sulod sang tatlo ka adlaw para sa pag-inquire sang mga dapat himuon.
Apang sa tion nga wala gihapon sang tikang, sila ang pagdagdagan sang 2nd notice.
Matapos ang 2nd notice kag makita nga wala nagahulag ang mga negosyo sa pagkuha sang business permit, sila ang igarekomendar na nga dagdagan sang Notice of Closure.
