Nagdangat na sa 40 ka mga repatriated Overseas Filipino Workers (OFW) sa ciudad sang Bacolod ang nakagraduate kag nagnegatibo sa RT PCR test.
Sa interview sang Bombo Radyo Bacolod kay Councilor Israel Salanga, pinuno sang Action Team on Returning OFWs (ATRO), ginpahayag sini nga sa una nga batch, 300 ang mga Bacolod OFWs ang nakapauli na sa ciudad kag gindugangan sang 300 pa, kag sa pinakaulihi nga update, gindugangan sang 28 ka iban pa.
Suno kay Salanga, kinahanglanon nga magsunod ang mga ini sa ginapatuman nga health protocols nga ginapatuman sa ciudad bangud wala nagakahulugan nga ang negatibo nga resulta sang RT PCR nagikan sa Manila ang negatibo bangud may yara sang mga kahigayunan nga ang negatibo ang nagpositibo sa tion nga liwaton na ini.
Gani dapat ipatuman ang tanan nga safety measures suno sa konsehal.
Nagpasalamat man ini kay Councilor Renecito Novero sa pagpanguna sa pagpangita sang Quarantine Centers kasubong man kay Mayor Evelio “Bing” Leonardia sa bulig pagpangita sang quarantine facilities.
Ginpahayag man sini nga wala sang problema sa pagpauli sang mga OFW sa ciudad bangud naantisipar na sang mga ini ang mass repatriation apang ang dako nga problema sang mga ini ang koordinasyon sang national government sa ciudad.
Suno pa diri, naintindihan sini ang nabatyagan sang mga OFW gani ginatinguhaan gid sang city government nga maamuma sila sang maayo.
