Kapin 400 ka mga locally stranded individuals kag repatriated overseas Filipino workers (OFWs) ang narelease nagikan sa mga quarantine centers sa probinsya sang Negros Occidental kahapon.
Sa interview sang Bombo Radyo Bacolod kay Provincial Administrator Atty. Rayfrando Diaz, ginpahayag sini nga madamo na sila sang napapauli nga mga LSIs kag repatriated OFWs sa nakaligad nga tatlo tubtob apat ka adlaw.
Suno diri, timing lang ini bangud nga natalana naman nga mag-inabot ang mga LSIs sumugod subong nga semana kasunod sang pagtapos sang apelasyon sang Western Visayas nga suspinderon anay ang pagpapauli sa ila sa sulod sang 14 ka adlaw.
Suno kay Diaz, yara nalang sa 2 mil ang backlog sa Teresita Lopez Jalandoni Provincial Hospital Molecular Laboratory apang natapos na ini kapang-test tanan kag ginahulat nalang ang resulta.
Samtang, ginkumpirmar man sang provincial administrator nga natalana nga magabukas subong nga adlaw ang quarantine facility para sa mga LSIs sa Barangay E. Lopez, Silay City.
Subong man nga adlaw magasugod liwat ang mga flights sang mga airlines para sa mga LSIs nagikan sa Metro Manila.
Ang Philippine Airlines ang may flight lamang kada Lunes kag Biyernes; Martes kag Huwebes naman ang Cebu Pacific kag ang Air Asia naman ang may biyahe lamang kada Miyerkules kag Sabado.
Suno kay Diaz, nagsulat si Governor Eugenio Jose “Bong” Lacson sa Civil Aviation Authority of the Philippines (CAAP) nga isa lamang ka flight kada adlaw ang pahanugutan sa Bacolod-Silay Airport.
