Patay ang 41 anyos nga lalaki matapos ginluthang sa Prk Kasagingan, Brgy Banago, Bacolod City pasado alas-10:00 subong nga aga.
Ang biktima ang ginkilala nga si Mark Anthony Gayatao alyas Butoy, 41 anyos, wala sang trabaho, kag residente sa Brgy Vista Alegre.
Sa interview sang Bombo Radyo Bacolod kay Alyas Sweet, asawa sang biktima, nagpadulong sila sa lugar bangod naga-istar ang isa sa ila bata sa ila nga tiya, kag sa kalapit nga eskwelahan naga-eskwela.
Suno diri, sa pagkahibalo sini, abyanay man ang iya bana kag ang suspect, apang indi lang gid masami nga naga-upod.
Pahayag ni Sweet nga hagadun sini kuntani mamahaw ang iya bana sang nakita niya nga nagalalisay sila sang suspect.
Nabatian na lamang sini nga may naglupok, nga ginsundan sang pagsinggit sang iya bana sang“indi na,” kag nagdalagan ini palagyo sa suspect.
Suno kay Sweet, may pilas na sa ulo si Gayatao sang ini ang nagapalagyo, kag ini ang ginlagas man sang suspect.
Ginabanta 20 metros pa ang gindalagan ni Gayatao tubtob nga ini ang nagsulod sa bukas nga balay, apang ini ang ginsundan kag didto na ginfinishing sang suspect.
Gilayon man nga nagpalagyo ang suspect matapos sang krimen.
Aminado si Sweet nga nagagamit sang illegal nga droga ang iya bana, apang ini ang wala pa makaagi priso bangod sa illegal nga droga.
Apang ini ang ginreklamo na sadto sa Violence Against Women and their Children (VAWC).
