Patay ang isa ka 41-anyos nga lalaki matapos ginpulihan labo sang pito ka mga suspetsado sa Sitio Tayunan, Barangay San Rafael, banwa sang Hinobaan sang Sabado.
Sa impormasyon nga nakuha sang Bombo Radyo, ginkilala ang biktima kay Junie Carbonilla, residente sang nasambit nga lugar.
Santo sa imbestigasyon sang kapulisan, nagpadulong sa puluy-an ni Carbonilla si Michael Indocan kun sa diin may nagluntad nga komprontasyon sa tunga nila.
Nahibaluan nga may yara sang daan hiligut-anon ang duha.
Matapos ang komprontasyon, hinali lamang nga ginlabo ni Indocan si Carbonilla sang binangon kag naigo ini sa abaga.
Nagbalos naman ang biktima kag ginlabo man sa ulo si Indocan.
Matapos nahibaluan sang anum ka mga himata sang suspetsado ang gindangatan sini, nagdinalagan sila sa balay sang biktima kag ginpulihan ini labo sa nagkalain-lain nga bahin sang lawas.
Gindala pa sa ospital si Carbonilla apang ginbawian na sang kabuhi.
Natigayon nga naaresto si Michael Indocan kag yara sa karun sa ospital bangud sa naagum nga pilas sa ulo samtang nadakpan man sanday Alex Indocan kag Eduardo Indocan.
Ang apat ka iban pa nga suspetsado nga ginkilala lamang sanday alyas Pinocio, Dodong-Buhat, Badot kag Bebe, ang at large kag sa karun padaon pa nga ginapangita sang kapulisan.
