Pilason ang 43 nga babayi matapos nga ginbuno sa Purok Lion Ville, Brgy Masilingan Bacolod City, Negros Occidental, kahapon, alas- 10:52 sang aga.
Ang biktima ang ginkilala nga si alyas Marisa, 43 anyos, samtang ang suspetsado naman ang ginkilala nga si alyas Zues, 40 anyos, lunsay mga residente sang nasambit nga lugar.
Sa inisyal nga imbestigasyon sang Bacolod Police Station 7, nagakaon sa isa ka store si Marisa kaupod ang iya hinablos sang nag-abot si Zues kag gin-atake sila.
Nakapalagyo ang hinablos samtang nag-agom sang pilas sa nagkalain-lain nga bahin sang lawas si Marisa.
Siya ang gilayon nga gindala sa malapit nga ospital samtang naaresto naman ang suspetsado sa hot pursuit operation nga ginpatigayon kag narecover ang 13 inches nga patalum.
