Patay ang 43 anyos nga lalaki matapos ginluthang samtang nagakatulog sa duyan sa Hda Banilad I, Barangay Nanca, EB Magalona, Negros Occidental, sang Miyerkules, alas-5:00 sang hapon.
Ang biktima ang ginkilala nga si Renante Belleza, 43 anyos, kag residente sang nasambit nga lugar.
Sa interview sang Bombo Radyo kay Police Capt. Markelly Laganipa, Deputy Chief of Police sang EB Magalona Municipal Police Station, suno sa pamilya nagakatulog sa duyan si Belleza sang may nabatian sila nga mga linupok.
Dali-dali sila nga naggwa agud makit-an ang sitwasyon apang ila na lang nasapwan nga wala na sang kabuhi si Belleza.
Siya ang may igo sang pagpangluthang sa liog kag dughan samtang wala man narekober ang cellphone sini matapos nga madula sa crime scene.
