Patay ang 44-anyos nga tricycle driver matapos ginluthang sang ginaalegar riding-in-tandem suspects sa Sharina Heights Subdivision, Barangay Taculing, Bacolod City, pasado alas 9:00 kagab-i.
Ginkilala ang biktima kay Arnold Bayking, 44 anyos kag residente sang Purok Progreso, Barangay Taculing, Bacolod City.
Sa interview sang Bombo Radyo sa security guard nga yara man sa lugar apang naghingyo nga indi paghingadlan, nakabati ini sang isa ka lupok kag iya nalang nakit-an ang babaye nga pasahero ni Bayking nga nagadalagan padulong sa Police Station 6.
Suno sa iya, nakit-an sini ang isa ka motorsiklo nga madasig ang pagpadalagan nagikan sa lugar apang wala naman nasiplatan kun pila ang sakay sini.
Nakaangkon si Bayking sang igo sa ulo.
Samtang, ginapalibugan naman sang bayaw sang biktima kun ngaa natabo ini sa iya bangud wala man sang bisyo kag kontra si Bayking.
Suno kay Bobby Chu, mabuot kag wala sang bisyo si Bayking.
Una ini nga nagtrabaho sa Libertad Public Market kag nagapanagtag sang arkabala sa mga vendors apang nauntat ini bangud sa road widening.
Bangud diri, nagbalhin ini sa pagbyahe sang tricycle kada gab-i agud may inugbakal sang pagkaon.
Suno kay Chu, isa lang sila ka balay ni Bayking kag wala man ini nagaistorya sa ila kun ano ang iya mga ginaubra.
