Patay ang 45-anyos nga babayi matapos ginlabo sang ginaalegar ila man lang kaingod-balay sa banwa sang Hinobaan.
Sa interview sang Bombo Radyo kay Police Major Clifford Batadhay, hepe sang Hinobaan Municipal Police Station, nagikan sa puluy-an sang iya nga abyan ang suspetsado nga si Renemark Cariaga, 32 anyos, residente sang Purok 4, Brgy. Asia, Hinobaan, sang nagpadulong ini sa isa ka sari-sari store nga ginapanag-iyahan sang biktima nga si Marilou Dela Peña.
Suno kay Batadhay, una nga nakaatubang ni Cariaga ang bana ni Marilou nga si Sereso Dela Peña kun sa diin nagpautwas ini sang balatyagon nahanungod sa iya abyan nga nalainan niya sang buot.
Gin-abisuhan naman ini ni Sereso nga pabay-an na lang kag indi na pagsapakon.
Suno sa hepe, nagpadulong sa ila likod balay si Sereso bangud mananggete ini sang lubi kag pagbalik sini sa tindahan matapos ang pila ka minutos, nasapwan sini si Marilou nga duguon kag may labo sa guya, liog, kamot, naidalom nga bahin sang ilok, kag dughan nga gintunaan sang iya kamatayon.
Wala naman nakit-an sang bana sa nasambit nga tiyange ang suspetsado.
Suno kay Batadhay, yara sa karun si Cariaga sa kustodiya sang Hinobaan Municipal Police Station apang indi pa ini maistorya bangud tulala ini kag wala nagahambal.
