Lunsay may mga global positioning system (GPS) na ang 45 ka mga garbage trucks nga ginagamit sang IPM Construction and Development Corporation.
Suno kay Ramel Palalon, officer in charge sang Department of Public Services, lunsay may mga GPS na ang tanan nga garbage trucks sang IPM nga naga-operate sa Bacolod City kag paagi sa isa lamang ka click, makit-an ang pangalan sang vehicle, pangalan sang driver, contact number, referrence number kag petsa.
Ang problema lamang suno kay Palalon, amu nga ang cellphone sa truck amu ang may GPS kag kun ini ang ginatawgan, nagakadula sa ila system ang impormasyon sang truck.
Kun ila naman personal nga numero ang gamiton, nagabalibad ang mga driver.
Suhestiyon sini nga kuntani hatagan ang mga ini sang analog nga cellphone agud dira na lamang matawag kag indi maapektuhan ang cellphone nga may GPS kun sa diin sila nagamonitor.
Nagapanugyan man ini sa mga drivers nga kun may yara sang wala nahakot nga basura sa ila schedule, ipahibalo ini sa management agud nga mabalikan pagkasunod nga adlaw.
Suno kay Palalon, nagaamat-amat naman ang dutay ang reklamo nga ila nagakabaton angot sa basura.
