Patay ang 46 anyos nga pedestrian matapos mabungguan sang motorsiklo sa Bangga Sto Rosario, Brgy. Mandalagan, Bacolod City alas-5:47 kaina sang aga.
Ang biktima ang ginkilala nga si Claire Sun, 46 anyos, single kag residente sang Sto Rosario Zone 5, Brgy Bata, Bacolod City.
Ang driver sang Yamaha XMAX nga motorsiklo ang ginkilala nga si John Denniel Divino, 24 anyos, single, residente sang Block 16 Lot 10 Carmela Subdivision, Brgy 5, Silay City samtang angkas naman sini si Mikko Christian De La Jente, 21 anyos, single kag residente sang Brgy Tabigue, EB Magalona.
Suno sa Traffic Enforcement Unit sang Bacolod City Police Office, samtang nagadalagan gikan sa sur padulong sa norte nga dereksyon sang dalan Lacson ang motorsiklo aksidente sini nga nabungguan biktima nga nagatabok sa pedestrian lane.
Ang pedestrian ang nag-angkon sang samad sa ulo kag gindeklarar nga wala na sang kabuhi sang Bacolod Rescue Team, samtang ang driver kag angkas sang motorsiklo ang gindala man sa Corazon Locsin Montelibano Memorial Regional Hospital matapos nga mag-angkon man sang samad sang sila ang matumba.
