Patay ang 46 anyos nga babayi matapos matampukan sang karga nga tubo gikan sa isa ka 14 wheeler truck sa Sitio Cabcab, Barangay Tabu, Ilog kahapon alas-6:30 sang aga.
Sa interview sang Bombo Radyo Bacolod kay Police Sr. Master Sgt Larry Arriola, tagpamaba sang Ilog Municipal Police Station, ang biktima ang ginkilala nga si Alma Claridad, 46 anyos, kasado kag residente sa nasambitan nga lugar.
Sa inisyal nga imbestigasyon, magkaupod nga nagalakat ang biktima kag ang iya nga bana alas-6:30 sang aga kag padulong kuntani sa kampo kun sa diin sila ang magapamatdan.
Apang ang 14 wheeler Isuzu Hauler Truck nga kargado sang tubo kag nagahusoy sa parehas nila nga dereksyon ang hinali nalang nga nadulaan sang kontrol.
Ini kasunod sang paglupok sang goma sa likod nga bahin sang truck.
Bangod sini nakahambal pa ang bana sang biktima nga maglikaw bangod padulong sa ila ang truck.
Nahimo pa nga makalikaw sang biktima, apang matapos nga matumba ang truck, ini ang nalab-ot kag natampukan sang karga sini nga tubo.
Suno kay Arriola, nagdangat pa sa isa ka oras ang rescue operation kag wala na sang kabuhi sang narecover ang biktima.
Gilayon naman nga nagpalagyo ang driver sang truck kag sa karun padayun nga ginapangita.
Pahayag ni Arriola nga natumod naman ang pangalan sang driver kag nakapadulong naman sa Ilog Municipal Police Station ang tag-iya sang truck.
Ini ang nagpasalig naman nga magabulig sa pamilya nga nalisdan kag sa pagpalubong sa biktima.
