Nabungguan ang isa ka lalaki matapos gulpyada nga nagtabok sang ginsaway sang isa ka security guard nga indi magtulog sa atubang sang bangko sa dalan Lacson, Bacolod City ala-1:00 kahapon sang kaagahon, Enero 21.
Sa interview sang Bombo Radyo kay Police Major Elmer Bonilla, head sang Traffic Enforcement Unit (TEU), ang honda click 125 nga ginamaneho ni Peter Paul Servicio, lalaki, 25-anyos kag residente sang Barangay 1, Bacolod city ang nagabyahe halin sa norte padulong sa sur sang aksidente sini nga nabungguan si Kenneth Ma-at, 46-anyos kag residente sang Sibucao, Barangay Banago.
Suno kay Bonilla, ginpukaw kag ginsaway sang isa ka security guard ang biktima nga indi magtulog sa atubang sang bangko.
Suno diri, namurag-muragan ang biktima kag hinali nga nagdalagan kag nagtabok sa kalsada rason nga nabungguan ini sang drayber sang amo nga motorsiklo.
Ang biktima ang nakaagom sang fractured injury sa iya nga tiil kag gilayon nga gindala sa Corazon Locsin Hospital samtang ang drayber naman ang naka-agom sang pilas sa bahin sang iya nga lawas kag gindala sa Riverside Hospital para sa nagakaigo nga pagbulong.
