Pilason ang 46 anyos nga pulis nga natirohan matapos ini magtambag sa nagluntad nga komosyon sa kapiyestahan sang Barangay Alimango, ciudad sang Escalante, kahapon alas 2:20 sang kaagahon.
Sa interview sang Bombo Radyo kay Police Major John Ganzon, hepe sang Escalante Police Station, na-assign sa intelligence unit si Poliice Master Segeant Teofesto Aburido, 46 anyos kag residente sa banwa sang Calatrava, apang ini gindeploy sa Barangay Alimango para magbantay sa kapiyestahan sang barangay.
Suno diri, natapos na ang duty ni Aburido kag siya mapapauli na kun tani apang may naglunatd nga kinagamo kag iya ini ginrespondehan.
Imbulbado sa komosyon sanday Sheriff Michael Bitela gikan sa La Carlota kag ang isa ka persona.
Pag-abot ni Aburido sa area para magtambag lang man kun tani, apang hinali na lang nga naggabot sang armas-luthang ang isa ka persona kag iya gintiro si Aburido sa dughan.
Na-igo man ang duha ka sibilyan nga sanday Jeban Sayon, 18 anyos, residente sang Purok Jongjang, Brgy Alimnago kag Jay-r Garganera, 34 anyos nga residente sa banwa sang Toboso.
Gilayon naman nga gindala sa ospital ang mga biktima agud mahatagan sang nagakaigo nga pagbulong.
Samtang, tubtob sa karun padayon ang hot pursuit operation sang kapulisan sa suspetsado nga wala pa nakilal-an.
