Pilason ang indi magnubo sa 46 ka indibidwal matapos magbungguanay ang duha ka tren malapit sa una nga estasyon sa Prague, Czech Republic.
Kalakip sa mga nakaangkon sang patal nga pilas amo ang duha ka driver sang tren.
Sa pihak sini, wala sang na-record nga ginbawian sang kabuhi.
Gilayon naman nga ginrespondehan sang mga rescue personnel kag emergency services agud ibakwit ang mga pasahero kag gindapatan sang first aid ang mga nasamaran.
Nagdangat sa halos duha ka oras ang operasyon antes mapagwa ang tanan nga sakay sang duha ka tren.
Lakip man sa mga pasahero ang 16 ka mga foreigners nga gindala sa ospital.
Ginkumpirmar sang kapulisan nga nakumpleto na ang rescue operation kag ginsugudan na ang maid-id nga imbestigasyon agud matumod ang eksakto nga rason sang aksidente.
Temporaryo naman nga naapektuhan ang operasyon sang iban pa nga tren nga nagabyahe sa nasambit nga lugar.












