Nasapwan nga yara na sa state of decomposition ang lawas sang lalaki nga may deperensya sa paminsaron sang ini ang masapwan kag ginapatihan nga naghikog sa banwa sang Calatrava, Negros Occidental.
Suno kay P/Maj. Roberto Indiape, hepe sang Calatrava Municipal Police Station, ang biktima ang ginkilala kay Rolando Polayapoy alias Angging, 47 anyos kag residente sa Purok Adelfa, Barangay Pinucotan, Calatrava, Negros Occidental.
Suno kay Indiape, sang una nga semana sang Marso pa sang nadula ang biktima kag nakita ini sang Lunes, Mayo 31 nga yara na sa state of decomposition.
Dugang pa ni Indiape nga nagalesensya man sa ila sadto ang iya nga anak kun mag lakat, apang wala na ini nakalesensya sang Marso sang ini ang nadula.
Ang iya man mismo nga amay nga si Cresencio Polayapoy, 68 anyos ang nakakita sang bangkay.
Nagapati naman ini nga nag-utas sang kaugalingon nga kabuhi ang iya nga bata nga may problema sa paminsaron pinaagi sa pagbitay gamit sang lubid nga ginhigot sa puno sang kahoy.
Pahayag sang amay nga nagapati ini nga wala sang foul play nga natabo.
Suno kay Indiape, may separado nga payag-payag ang biktima nga malayo sa puluy-an sang iya ginikanan kag may gina-amuna nga duta, kag didto man ini nasapwan.
