Nagdangat na sa 47 ka mga persona nga nakapalapit sa ikaduha nga pasyente sang coronavirus disease sa probinsya sang Negros Occidental ang na-trace sang mga health officials kag napaidalom sa testing para sa virus.
Suno kay La Castellana Mayor Rhumyla Nicor-Mangilimutan, ang 47 ka mga persona ang ginalakipan sang 20 nagikan sa Barangay Nato sa diin nagaistar ang 43-anyos nga driver nga nagtrabaho sa Pavia, Iloilo; 16 ka rescue personnel kag 12 ka doktor kag nurse.
Nahibaluan nga gilayon nga ginpaidalom sa lockdown ang Barangay Nato samtang ang iban naman nga mga barangay sa La Castellana ang yara sa enhanced community quarantine.
Diri sa Bacolod, ginpahayag naman ni Vice Mayor El Cid Familiaran nga siyam ka mga persona ang ila na-trace.
Ini ang ginalakipan sang duha sa Purok Bulak, Barangay Mandalagan kag pito sa Barangay Estefania.
Gilayon man sila nga ginpaidalom sa test apang wala man sang sintomas sang COVID nga nakita sa mga ini.
Ang driver ang ginalantaw nga nalatnan sang virus sa Pavia, Iloilo kun sa diin duha sini ka employer ang nagpositibo sa COVID.
Nakuhaan naman sang swab sample ang misis kag anak sini apang lunsay sila nagnegatibo sa nasambit nga balatian.
Kagab-i, ginpahayag ni Provincial Health Officer Dr. Ernell Tumimbang nga ginclassify na nga persons under monitoring ang 39 ka mga persona sa La Castellana nga nakapalapit sa driver kag sila ang ipaidalom sa test.
