Nagpablotter ang 47 ka mga residente sang banwa sang La Castellana matapos nga nabiktima sang scammer sa bulig sang ila nga Sangguniang Bayan member nga si Donato ‘Natnat’ Dumaguit kun sa diin minilyon ka pesos ang nakuha sa ila.
Suno sa tagreklamo nga si Garry Marfil, 35-anyos, residente sang Barangay Manghanoy, La Castellana, ang mga luyag magsulod sa Philippine National Police ang mga biktima kun sa diin sila ang gintanyagan sang package deal nga P247,000.
Suno kay Marfil, nangin taytay si Dumaguit agud nga makapalapit sa ila ang nagpakilala nga recruiter nga si Mary Jun De Los Santos.
Sa pamilya nanday Marfil, ang una nga nagbayad amo ang iya nga manghod kag bayaw gani ginpaandaman niya ang mga ini nga mahimo mabiktima sila sang scam.
Sang nakamutik si Dumaguit nga nakahibalo si Marfil sang modus, nagkadto ini sa ila nga balay kag siya ang gin-istorya.
Sang nahibaluan ni Dumaguit nga 35 anyos na si Marfil, ginpaathagan niya ini nga sarang pa ini makasulod sa PNP bangud 38 anyos ang age limit kag oportunidad naman ini para sa iya.
Bangud sini, ginprenda sang iloy ni Marfil ang ila nga kampo agud nga makabayad.
Base sa presentasyon ni Dumaguit, P247,000 ang package deal kag matake oath sila sa Kabankalan bilang patrolman, antes ang training sa Murcia kun sa diin sila ang may batunon na nga sweldo.
Bangud konsehal si Dumaguit, ila ini nga ginasaligan kag sang March 23, naghatag sang 1st payment si Marfil kag ang iya iloy sa balor nga P70,000.
Ini ang nasundan pa gid sang P30,000 kag P100,000 ukon kabug-usan nga P200,000.
Sang July, nagpanawag si Dumaguit nga makigsapol sa ila si De Los Santos diri sa Bacolod apang sila ang magabayad sang P20,000 bangud sila ang magatake oath sa National Capital Region.
Suno sa iya, refundable ang P20,000 bangud para ini sa board and lodging.
Nagpadulong man ang mga ini sa Bacolod apang ini na ang ulihi nila nga pagkitaay ni De Los Santos kag indi naman macontact si Dumaguit.
Magluwas kay Marfil, ang iya nga manghod kag bayaw ang nakuhaan man sang P500,000 matapos nga nagbayad sang tag-P275,000 kada isa, samtang madamo pa gid nga iban nga pumuluyo sang La Castellana ang nabiktima.
Sang Biyernes, nagpablotter ang mga ini sa La Castellana Municipal Police Station kag 47 ang kabug-usan nga tagreklamo.
Suno kay Marfil, si Dumaguit ang nagserbe nga taytay para kay De Los Santos apang indi niya maestablish kun san-o sila nagkilalahay.
Nagpadulong man sila sa National Bureau of Investigation apang ginpabalik sila sa La Castellana Municipal Police Station bangud didto natabo ang bayranay.
Suno kay Marfil, desidido sila nga magfile sang reklamo batok sa SB member kag kay De Los Santos.
Nagpasalig naman si Mayor Rhumyla Nicor-Mangilimutan nga sila ang buligan bisan kaalyado pa niya si Dumaguit.
