Nagapati ang battalion commander sang 47th Infantry Battalion sang Philippine Army nga may duha nga napatay nga katapo sang South West Front sang New People’s Army sa engkwentro sa Brgy Masaling, Cauayan, Negros Occidental.
Sa interview sang Bombo Radyo Bacolod kay Lt Col Dennis Martinez, may-ara sila sang asset nga nagsugid nga may duha nga napatay sa kampo sang mga rebelde.
Madumduman nga nakasumpong sang militar ang mga remnants sang South West Front sa pagpamuno ni Rex Campus alias “Kalbo” sang Mayo 4.
May naglapta naman nga balita nga may duha nga napatay sa militar, apang una na nga ginklaro ni Martinez nga wala sang militar nga napatay kag wala man sang bisan nasamaran lamang.
Apang bangod may-ara sang nakita nga madamo nga dugo sa encounter site, gani nagapati si Martinez nga may kamatuoran ang report tuhoy sa mga napatay nga NPA members.
Panawagan sini sa sin-o man nga may nakita nga ginlubong ukon may natalupangdan nga makaduluda nga ipahibalo sa militar, agud mahatagan man sang desinte nga lubong ang mga biktima, kag mapabalo sa ila nga pamilya.
