Patay ang 48 anyos nga babayi matapos malapakan sang truck nga may karga nga tubo kasunod sang pagkabunggo sang public utility jeep (PUJ) sa isa ka tricycle sa Barangay Patic, Pulupandan, Negros Occidental alas-9:30 kaina sang aga.
Sa interview sang Bombo Radyo Bacolod kay Police Capt. Emman Anacleto, hepe sa Pulupandan Municipal Police Station, nagasunod ang PUJ sa tricycle nga ginamaneho ni Danilo Arandilla, 46 anyos samtang backrider naman sini ang iya asawa nga si Lilibeth Arandilla, 48 anyos, residente sa Barangay Pacol, Bago City.
Ang tricycle kag Jeep nga ginamaneho ni Joeffrey Chica, 49 anyo, residente sa Barangay Zone 2, Pulupandan ang lunsay nagabyahe pasulod sa Municipal proper samtang sugata naman sang mga ini ang 10-wheeler truck nga may karga nga tubo nga ginamaneho ni Alvin John Cordero, 28 anyos, residente sa Barangay Lag-asan, Bago City.
Sa imbestigasyon sang kapulisan, nabungguan sang jeep ang likod nga bahin sang tricycle.
Bangod may-ara sang sanga sang kahoy nga mabungguan kuntani sang tricycle, ginwarik sang driver ang manubela kag ini ang nakatabok sa lane sang truck.
Mahimo naglabog ang mag-asawa bangod sa impact kun sa diin si Lilibeth ang nalapakan sang truck sa tyan, gani naggwa ang internal organs sini nga nagresulta sang gilayon nga kamatayon.
Nautod naman ang kamalagko nga tudlo ni Danilo nga gilayon nga ginhingagaw sa Bago City Hospital agud madapatan sang pagbulong.
Sa karun, yara na sa kustodiya sang Pulupandan Municipal Police Station ang driver sang jeep kag truck samtang padayun pa ang imbestigasyon sang kapulisan kun ano gid ang gintunaan sang aksidente.
