Nagtawhay na sa mga puerto sa Western Visayas subong nga adlaw kun kumparar sa pagdagsa sang mga pasahero kahapon, santo sa monitoring sang PCG District Western Visayas.
Sa interview sang Bombo Radyo kay PCG District Western Visayas spokesperson Commander Jansen Benjamin, generally peaceful na kun kabigon ang sistema sang mga puerto nga mahimo na makontrolar ang sitwasyon sa byahe.
Suno diri, kahapon sang udto nagdagsa ang mga pasahero sa mga puerto ilabi na sa Bredco port nga nakitaan may yara sang malawig kag madugay nga pilahay sang mga pasahero.
Sa record sang PCG sa probinsya sang Negros Occidental, may yara sang narekord nga 48,000 outbound passengers kag 45,401 naman ka inbound passengers.
May yara man sang pila ka madalagko nga truck kag private cars ang ginkarga para sa byahe gani may yara sang strikto nga implementasyon ang PCG sa kapasidad sang barko para sa safety sang mga pasahero kag mahilway sa mga posible nga maglunatd nga insidente samtang nagabyahe.
Ginakabig sa gihapon nga may pinakamadamo nga pasahero amo ang nasakupan sang Coast Guard Station sa Aklan, 176,029 nga inbound passengers kag 185,656 outbound passengers.
Samtang, may yara lamang sang isa ka kaswalidad nga narekord ang PCG District Western Visayas, sang Abril 5 may speedboat nga nagkuha sang guests sa Caticlan apang pagbalik sini sang gab-i, ini nakabunggo sa isa ka bangka nga nagresulta sa kamatayon sang isa ka indibidwal apang sa Negros Occidental, wala sang ano man nga insidente sang pagkalumos.
Mensahe ni Benjamin sa mga mananagat nga magbalon sang life saving instrument kag magdala sang cellphone nga nakaputos sa plastic nga kun may magluntad nga insidente, makakomunikar kag makapangayo sang bulig.
Pahanumdom man sini nga maghalong pirme kag maghibalo sa update sang panahon.
