102 ang panibag-o nga nagdugang sa kaso sang COVID-19 sa probinsya sang Negros Occidental kahapon samtang 48 naman ang nagdugang nga kaso sa syudad sang Bacolod.
Sa COVID-19 Regional Case Bulletin No. 423 nga ginpagwa sang Department of Health Center for Health Development-Western Visayas, nadugangan sang 253 ang kaso sa Region 6.
Sa nasambit nga numero siyam diri ang nagikan sa Aklan; pito sa Antique; isa sa Guimaras; 37 sa Iloilo; 102 sa Negros Occidental; 48 sa Bacolod City kag 49 ang nadugang sa Iloilo City.
Bangud diri, nagdangat na sa 43,609 ang kabug-usan nga kaso sang COVID-19 sa Western Visayas kun sa diin nadugangan sang 214 ang mga nag-alayo sa balatian gani yara na ang kabug-usan nga recoveries sa 36,404 samtang nagdangat naman sa 1,055 ang death toll matapos madugangan sang walo ka nagtaliwan bangod sa virus.
Ang 102 nga nadugang nga kaso sa probinsya sang Negros Occidental ang lunsay mga lokal cases.
Samtang 46 naman sa mga panibag-o nga kaso sang COVID-19 sa Bacolod City ang Local Cases kag duha ang Authorized Person Outside Residence (APOR).
Nagdangat na sa 8,971 ang kabug-usan nga kaso sang COVID-19 sa Bacolod kun sa diin 1,190 ang aktibo; 7,535 ang nag-alayo kag nagdangat na sa 245 ang nagtaliwan.
Samtang yara naman sa 14,188 ang kabug-usan nga kaso sang COVID-19 sa Negros Occidental kun sa diin 1,792 ang aktibo; 12,125 ang nag-alayo kag nagdangat na sa 264 ang death toll.
