Dakop sa entrapment operation nga ginpatigayon sang Bacolod City Criminal Investigation and Detection Group (CIDG) ang isa ka 49-anyos nga lalaki sa Purok Carvic, Barangay Mandalagan ciudad sang Bacolod kahapon sang aga.
Ginkilala ang suspetsado kay Romeo Lobaton, isa ka negosyante kag residente sa amo nga barangay.
Sa interview sang Bombo Radyo Bacolod sa pinuno sang CIDG-Bacolod nga si P/Chief Master Sgt. Ramiro Gocotano, ginpahayag sini nga natigayon nila nga madakpan sa entrapment operation sa pagbayolar sang Republic Act 10591 ukon Comprehensive Firearms and Ammunition Regulation Act ang suspetsado.
Nakuha sa paghinakop ni Lobaton ang isa ka panid sang P100 bill nga marked money; 32 ka panid sang boodle money sa nagkalain-lain nga denominasyon; isa ka unit sang Colt Cal. .45 pistol; isa ka magazine para sa cal. .45 pistol kag isa ka unit sang caliber .22 magnum revolver nga may unod nga lima ka mga live ammunitions.
Suno kay Gocotano, tatlo ka semana nila nga ginmonitor ang suspetsado antes ginpatigayon ang operasyon.
Ginapahayag nga ang suspetsado ang imbolbado sa gun running sa ciudad sang Bacolod.
Sa karon yara na sa kustodiya sang CIDG Bacolod si Lobaton kag ginahanda na ang kaso nga ipasaka batok sa iya.
