Patay na sang nasapwan kag nagulgol na ang liog sang isa ka lalaki sa Purok 7, Barangay Asia, banwa sang Hinobaan, Negros Occidental sang Sabado sang kaagahon.
Ginkilala ang biktima kay Mistocles Juliane, 49-anyos, kasado kag residente sang nasambit nga lugar.
Ang biktima ang nasapwan sang iya anak nga si Jaime nga may pilas halin sa idalom sang iya dulunggan padulong sa liog kag sa iya nga nawong.
Sa interview sang Bombo Radyo Bacolod kay Police Major John Ganzon, hepe sang Hinobaan Municipal Police Station, suno sa anak sang biktima, magkaupod sila sang iya amay nga nagpadulong sa uma sadtong Byernes sang aga, apang ginsugo siya sang amay nga magpadulong sa banwa agud may baklon.
Wala na nakapauli ang amay pagkagab-i rason nga ini ang ginpangita.
Apang pagkaaga, nasapwan nalang nga wala na sang kabuhi ang biktima kag may pilas na ini sa liog.
Ginalantaw sang mga kapulisan nga personal grudge ang rason sa pagpatay sa biktima.
Isa man sa ginalantaw sang mga otoridad nga may kaangtanan sa away sa duta ang rason sang pagpatay sa biktima.
Suno kay Ganzon, indi pa maestablisyar kun may kaupod ang suspect sa pagpatay sa biktima bangud mahimo man ini sang isa ka tawo.
Padayon pa sa karun ang imbestigasyon sang mga kapulisan sang Hinoba-an sa nagluntad nga insidente agud nga matumod ang nagpatay sa biktima kasubong man ang motibo sang krimen.
