BACOLOD CITY – Nagapabilin sa ospital ang hepe sang Bacolod City Police Station 3 matapos gintiro sang high value target nga drug personality kaina sang kaagahon.
Base sa impormasyon nga nakuha sang Bombo Radyo Bacolod, nagpatigayon sang anti-illegal gambling operation ang mga miyembro sang Police Station 3 sa Purok Pandan, Sitio Sibucao, Barangay Banago.
Apang sang nagapalapit pa lang ang mga pulis, nagpalupok na si Ramy Poja nga ginakilala nga number one most wanted person sang Police Station 3.
Naigo sang bala sa iya duha ka paa ang hepe nga si Police Senior Inspector Victor Paulino kag gilayon nga gindala sa Bacolod Adventist Medical Center.
Magluwas sa hepe sang pulis, may iban pa nga mga residente sa lugar nga napilasan matapos maglapos sa isa ka puluy-an ang bala.
Ini ang ginalakipan sang mag-iloy nga sanday Erlinda Cordova nga may igo sa kamot kag Jhodan Cordova, 20-anyos, nga nakaangkon sang pilas sa wala na bahin sang iya lawas.
Sang Pebrero, si Poja ang nakapalagyo man sa operasyon sang Philippine Drug Enforcement Agency (PDEA).
