Kumplikado ang istorya sang iya kabuhi apang lunsay gratefulness ukon pagpasalamat ang nabatyagan sang 4th placer sa September 2026 Psychometricians Licensure Examination nga tumandok sang Brgy. E. Lopez, Silay City, Negros Occidental.
Si Kissaneth Malasibas, Summa Cum Laude sa kurso sa BS Psychology sa University of Saint La Salle ang nakakuha sang 93.60 percent rating.
Sa interview sang Bombo Radyo Bacolod kay Malasibas, wala siya sang bitterness nga nabatyagan bisan kumplikado ang iya kabuhi.
Lima pa lang ka tuig si Malasibas sang nagbulagay ang iya ginikanan.
Sang elementary, siya ang nabilin sa luyo sang iya lola sa Silay bangud nagatrabaho diri sa Bacolod ang iya iloy.
Sang high school, nagsaylo siya sa iya tiya sa Capiz nga amo naman ang nagpaeskwela sa iya.
Sang college, nagbalik si Malasibas diri sa Bacolod kun sa diin ang iya iloy nga si Mylene Costamares ang nagpaeskwela sa iya, sa bulig man sang mga himata nga nagahatag sang bulig-pinansyal.
Suno kay Malasibas, indi mahapos ang iya sitwasyon apang nagtulod ini sa iya nga magtutom sa pagtuon.
Nagpasalamat ini sa iya iloy nga nagapulaw bilang team leader sa isa ka call center company agud nga siya ang mapaeskwela, kaupod ang iya manghod.
Subong nga nakapasar na ini sa board exam, nagpasalamat si Malasibas sa iya iloy, mga paryente kag mga tawo nga nagbulig sa iya.
Nadumduman man ni Kissaneth ang iya 7-year-old self nga nagpangamuyo sadto sa Ginuo nga malampuwasan niya ang tanan nga kabudlay sang isa ka miyembro sang broken family gani lunsay gratefulness ang iya nabatyagan sa baylo nga mangin bitter sa kabuhi.
