Nagdangat na sa 52,262 ka mga kabataan ang nakabatun sang COVID-19 vaccine shots humalin sang pag-umpisa sang vaccinations sa mga edad lima tubtob onse anyos sang Lunes.
Suno kay Health Undersecretary Maria Rosario Vergeire, sa masobra 50 mil nga mga kabataan nga nakabatun sang reformulated low-dose Pfizer COVID-19 vaccine, apat lang ang nakabatyag sang minor reactions kaangay sang pagsakit sang ulo kag rashes.
Pasalig ni Vergeire nga gilayon man ini nga namanage.
Una na nga nag-anunsyar ang Malacaniang nga ang five to eleven age group vaccinations ang patigayunon sa pila ka mga sites sa Metro Manila.
Ini ang ginalakipan sang Philippine Heart Center, Philippine Children’s Medical Center (PCMC), National Children’s Hospital (NCH), Manila Zoo, SM North Edsa (Skydome) kag sa Fil Oil Gym sa San Juan City.
Suno sa National Vaccination Operations Center, ang national rollout ang patigayunon sa Lunes, Pebrero 14.
Ginpahayag ni Presidential Adviser for COVID-19 Response Vince Dizon nga confident ang Duterte Administration nga pahanugutan sang mga korte ang pagpadayun sang COVID-19 vaccinations sa lima tubtob onse anyos.
Nahibaluan nga sang damlag lang sanday Dominic Almelor kag Girlie Samonte ang naghingyo sa Quezon City Regional Trial Court sang Temporary Restraining Order (TRO) sa rollout sang pediatric vaccination sa nasambit nga age group.
Ang mga petitioner ang ginarepresentar naman sang unvaccinated chief sa Public Attorney’s Office nga si Persida Acosta.
