Ginkumpirmar na sang pamilya sang 5 anyos nga namissing sa Purok Manville Phase 6A Brgy. Handumanan sang Disyembre 21, nga ini ang bangkay nga nasapwan sa sapa sa Prk Sto Domingo, Brgy Handumanan, Bacolod City.
Alas-10:00 sang aga, nasapwan ang bangkay sa sapa sa Prk Sto Domingo, masobra isa ka kilometro ang kalayuon sa balay sang bata.
Sa interview sang Bombo Radyo Bacolod kay Jeymar Blancada, nakakita sang bangkay, sila ang masami nagapamahaw sa balay sang iya ugangan sa tupad lamang sang sapa.
Sang siya ang magpangihi kapin alas-10:00 subong nga aga, natalupangdan sini ang tiil nga kaangay sang iya ka bata.
Gilayon sini nga gintawag ang iya asawa nga amo ang nagcontact sang Barangay Officials.
Samtang tuman naman ang hilibion sang pamilya ni Quenie Aguirre, matapos makumpirmar ang panapton nga amo man ang suksok sang biktima sang madula, paagi sa litrato nga ginpakita sa ila.
Ang identity ang wala gilayon makumpirmar bangod natabunan sang mga dahon ang lawas sang bata kag ang palda lamang ang makita.
Samtang indi naman maklaruhan ang nawong sini bangod isa na ka semana humalin sang namissing.
Apang sa obserbasyon sang Bombo News Team, indi pa bloated ang bangkay kag ang batiis pa lamang ang bahin nga nagagit-om.
Nakaangkon man sang kanbudlayan ang Scene of the Crime Operation (SOCO) sa pagpasaka sang bangkay.
Sang mapasaka, wala na ginhapit sa pamilya ang bangkay kag ginderetso na dala sa punerarya.
Dito na lamang ginpadulungan sang pamilya agud kumpirmahon gid ang identity sang bata.
