Ginbawian sang kabuhi ang lima ka tuig nga bata matapos malumos sa swimming pool sang isa ka resort sa banwa sang San Enrique sang Enero 1.
Sa interview sang Bombo Radyo Bacolod kay Police Captain Rosinie Cabuena, acting Chief of Police sang San Enrique Municipal Police Station, ang pamilya sang biktima ang naga-outing sa nasambit nga resort sang matabo ang pagkalunod alas-2:10 sang hapon.
Natalupangdan na lamang ang pagkalumos sang bata sang may nabatian nga nagsinggit, kag ini ang gilayon man nga ginpatakas sang iya pamilya kag gin-CPR.
Nabatun sang mga otoridad ang report alas-2:15 sang hapon kag gilayon man nga narespondihan.
Gindala pa sa Valladolid District Hospital ang biktima apang ini ang gindeklarar nga napatay alas-3:30 sang hapon.
Suno kay Cabuena, duha ang swimming pool sa nasambit nga resort, isa ka kiddie pool kag isa nga para sa adult nga nagdangat sa apat tubtob lima ka tapak.
Pahayag sang ginikanan nga kaupod nila ang bata sa kiddie pool, gani mahimo wala lamang sang may nakatalupangod nga ini ang nagsaylo sa adult pool.
