Ginsuguran na kahapon, Martes, June 25, ang pagpatigayon sang Experimental Road Test sang electric jeepneys sa Barangay Cabug, Bacolod City.
Ini ang patigayunon sang lima ka adlaw kun sa diin sila ang magahatag sang Libre Sakay para sa napili nga ruta.
Ang ruta sang e-jeep ang magahalin sa Deca Homes Subdivision padulong sa Bangga Cory tubtob sa Libertad Public Market vice versa.
Sa interview sang Bombo Radyo Bacolod kay Punong Barangay Jennifer Pintucan, ginapakamaayo sini nga wala sang problema sa una nga adlaw sang implementasyon.
Antes pa man, ila na nga ginsugilanon ang mga Tricycle Operator and Drivers Association (TODA) natuhoy sa implementasyon kag ang mga ini ang nagsugot man.
Dugang pa nga indi man peak hours ang pagbyahe sang Libre Sakay sa una nga duha ka adlaw kun sa diin subong nga adlaw tubtob bwas, ang apat ka unit sang E-Jeep ang nagabyahe halin alas-9:00 sang aga asta sa hapon.
Apang agud matakos gid ang volume sang pasahero, sumugod sa Huwebes tubtob sa Sabado ang E-Jeep ang magabyahe halin alas-6:00 sang aga tubtob alas-4:00 sang hapon.
Paathag ni Pintucan nga madamo sang mga pumuluyo nga madugay na nga nagahulat nga mahatagan sang ruta ang lugar, bangod mabudlay kag magasto ang magdoble sakay.
Aminado ang Punong Barangay nga masakit sa iban nga tricycle driver apang paathag sini nga may mga pasahero paman nga nagapadulong sa iban nga mga areas nga lain sa routa sang E-Jeep, ilabi na nga ang gamay nga numero sang E-Jeep units ang indi man makasarang magcater sang tanan nga pasahero.
