Mas ginpabakod pa sang lima ka dugang nga mga akusado sa assassination ni anay Negros Oriental Governor Roel Degamo ang ila nga pagbawi sang ila testimoniya nga nagatum-ok kay suspended Negros Oriental Representative Arnolfo “Arnie” Teves Jr. sa nasambit nga krimen.
Suno kay Atty. Andres Manuel nga legal counsel ni Teves, sanday Winrich Isturis, Joric Labrador, Benjie Rodriguez,kag Eulogio kag John Louie Gonyon ang nagpanindugan sang ila pagbawi sang ila pahayag online via zoom.
Sang nagligad nga semana, una na nagbawi sang ila testimoniya ang mga akusado nga sanday Romel Pattaguan, Dahniel Lora, Osmundo Rivero, Joven Javier, kag Rogelio Antipolo.
Suno sa abugado ang recantations sang napulo ka mga akusado ang mangin bastante nga basehan agud ila kwestiyunon ang multiple murder complaints nga gin-file batok kay Teves.
Una na ginpahayag sang Justice Department officials nga nagapabilin nga mabakod ang kaso sa pihak sang pagbaliskad sang mga suspetsado kag nanindugan ang ahensya nga may mabakod sila nga ebidensya batok sa mamalidha.
Samtang, padayon nga pagpakigbato sang kampo ni Congressman Arnolfo Teves Jr. Agud ma-inhibit ukon mapahalin ang Department of Justice (DOJ) sa ila motion for inhibition.
Sa preliminary investigation, ginsiling sang abogado ni Teves nga si Atty. Andres Manuel nga magapasaka sila sang motion for reconsideration angut sa pagbasura sang DOJ Panel of Prosecutors sa ila nga motion for inhibition.
