Ginakalipay ni Bacolod City Lone District Congressman Greg Gasataya ang P5 million nga pondo nga ihatag sang Department of Health sa Teresita Jalandoni Provincial Hospital agud makapatigayon sang swab tests ang mga residente sang Bacolod.
Sa interview sang Bombo Radyo kay Gasataya, ginpahayag sini nga dako gid nga bulig para sa ciudad subong man sa nasambit nga ospital ang P5 million nga pondo nagikan sa DOH, samtang wala pa nabuksan ang molecular lab nag ginapatukod sa Corazon Locsin Montellibano Memorial Regional Hospital.
Suno kay Gasataya, ang ini nga tikang ang kabahin sang memorandum of agreement sa tunga sang DOH kag Teresita Jalandoni Provincial Hospital nga kun may yara sang kinahanglanon nga itests sa mga taga Bacolod, sa ahensya lang icharge ang expenses.
Suno diri, mas madasig kag mahapos ini kumparar kun sa Iloilo pa mapakuha sang test ang mga taga ciudad.
Apisar nga wala man sang problema sa provincial hospital nga magbaton sang mga taga Bacolod, suno sa kongresista, mas manami gid kun may yara sang pondo.
Gindugang man sini nga naapresyar gid ini sang ciudad kag ginakabaig nga welcome development.
