Patay ang 50-anyos nga amay matapos mabunggoan sang motorsiklo sa provincial road sang Hacienda Najalinan, Brgy Robles, La Castellana, Negros Occidental sang Miyerkules, alas-11:50 sang gab-i.
Ang biktima ang ginkilala nga si Johnell Divinagracia kag kaupod sini ang iya asawa nga si Jina Divinigracia kag ang bata nila nga lalaki nga menor de edad, mga residente sang Hda. Jamandre, Brgy. Robles, samtang ang driver naman sang motorsiklo amo si Gorken Maghari, 35- anyos, residente sang Hda. San Julian, Brgy Crossing Magallon, Moises Padilla.
Sa interview sang Bombo Radyo Bacolod kay Bombo Radyo Bacolod kay Police Captain Jose Michael Munez, Deputy Chief Police sang La Castellana Municipal Police Station, naguba ang motorsiklo ni Johnell amo nga ginatulod-tulod niya na lamang ini sa dalan.
Apang nabunggoan siya sang motorsiklo ni Gorken nga nagabyahe sa kaangay nga dereksyon kag bangod sa impact nag-agom sang pilas ang duha ka driver.
Gindala pa sa ospital si Johnell apang gindeklarar nga dead on arrival samtang si Gorken naman gindala sa ospital sa ciudad sang Bacolod para sa nagakaigo nga pagbulong samtang ginapakamaayo naman nga wala nasamaran ang asawa kag bata ni Johnell.
